Datainspekšuvdna ii gieldde sámedikki bidjamis beavdegirjjiid Internehttii
Ruoŧa datainspekšuvdna ii gal gieldde sámedikki almmustahttimis ollesčoahkkinbeavdegirjjiid Internehtii, nu movt sámedikki dieđiheaddji ovdal lea dadjan.
 Sámi Radio, Ruoŧabeal Sápmi: 04.01.2005 kl. 10:18
Jos hálidat lohkat mearrádusaid maid sámedikki politihkarat leat mearridan ollesčoahkkimis de fertet mannat sámedikki čállingoddái dahje riŋgestit dohko beaivet ja sihtat sin sáddet beavdegirjji dutnje.
Mii guoska gielddaide ja leanadikkiide Ruotas de sáhtat álkit lohkat beavdegirjjiid ja mearradusaid Interneahtas birra jándora.
Sámediggi lea moiton go ii fála dan bálválusa.
Gielda - ii gieldde
Dieđiheaddji Marie Enoksson dadjá ahte datainspekšuvdna lea gieldan sámedikki bidjamis čoahkkinbeavdegirjjiid Internehtii, vaikko eara sullásaš orgánat dahket dan.
Muhto Sámi Radioi buktá datainspekšuvnna Hans Olof Lindblom eara dieđuid. Lindblom ii gal gieldde sámedikki bidjamis beavdegirjjiid Internehttii.
Eai vahágahte
Váldoášši das leat namat ja eara dieđut olbmuid birra mat soitet gávdnot beavdegirjjiin ja jos oažžu almmustahttit daid Internehttii.
Lindblom meidne ahte sámediggi sáhttá geahččat njuolggadusaide mat gusket gielddaide ja leandikkiide.
Daid mielde ii galgga almmushattit dieđuid priváhta olbmuid birra, muhto politihkariid birra lea ortnegis. Sáhttá maiddai bidjat dieđuid dábálaš olbmuid birra jos leat dakkar dieđut mat eai vahágahte dábálaš olbmu priváhta dili.
Lea vejolašvuohta
Hans Olof Lindblom lohká ahte sámedikki beavdegirjjit vuordimis leat sulli seammelaganat go gielddaid, dainna sáhttá ge oažžut buriid rávvágiid gielddaid njuolggadusain ja de maid vejolašvuođa almmustahttit beavdegirjjiid internehttii.
 Disdaga dii 08.00
Ovddit ášši:
3/1-2005: Sámediggi ii bijá beavdegirjjiid Internehttii
|
