Sámediggi ii bijá beavdegirjjiid Internehttii
Ruoŧa Sámediggi ii mieđit bidjat čoahkkinbeavdegirjjiid Internehtii, vaikkou eara eiseválddit ja álbmotválljejuvvon orgánat Ruoŧas dahket nu.
 Sámi Radio, ruoŧabeal Sápmi: 03.01.2005 kl. 10:54
Álgit geahččat maid Sámediggi dahká nu ahte válljejeaddjit galget oažžut dieđu sin barggu ja mearrádusaid birra., dahje rievtti mielde geahččat maid Sámediggi ii daga.
Rabasvuohta
Šaddá álkibu ja álkibu váldit sealvái maid politihkarat maid don leat válljen barget. Jos ovdamearkkadihte hálidat diehtit maid du gielda lea mearridan de ii leat go mannat internehttii ja lohkat dan birra. Leanadikkit, leanastivrrat ja gielddat Ruotas almmustahttet beavdegirjjiid internehttii ja barget stuorit rabasvuođa ovdii, juste ráđđehusa áigumušaid mielde nu ahte don galggat šaddat eanet oassálaš demokráhtalaš proseassas.
Ii Sámedikkis
Muhto gavdno nuppelagan ovdamearka, Sámediggi.
Ruotabeal Sámedikki dala stivrajoavkku váldosánit ovdal mannan válggaid lei stuorit rabasvuohta. Duohtavuođas barget nuppeladje.
Ovdal gávdnoje ollesčoahkkinbeavdegirjjit Sámedikki ruovttusiiddus internehtas, dal leat váldon eret. Per-Jonas Parffa, Johkamohkis moaitá dan.
PUL-láhka
Olmmošdieđihanlahka (personuppgiftslagen), PUL nammasaš lahka bođii Ruotas jagi 1998 ja čilge movt gieđahallat dieđuid olbmuid birra, earreteara interneahtas.
Datainspekšuvdna lea eiseváldi mii galgá sudjet olbmo priváhta eallima IT-servodagas.
Ii oačču
Sámedikki dieđiheaddji Marie Enoksson lohká son lea ságastan Sámedikki čállingoddehoavddain ja datainspekšuvnnain ja ožžon dieđu ahte lea earru Sámedikki ja gielddaid ja leanadikkiid gaskan ja ahte Sámediggi ii oačču bidjat beavdegirjjiid internehttii PUL-lága geažil.
Muhto manin lea dakkár earru Sámedikki ja eara eiseválddiid ja orgánaid gaskan ruotas? Vai lea go duođaid earru?
Mii joatkit ohcat vástádusa boahttevaš ođđasiin.
|
