 |
čálit 
|
|
|
|
|
|
|
|
|
|
- Váidán gárihahtton ja veagalváldon
|
|
|
|
|
|
|
Áhčit lohkaba ožžon goddináitagiid
Áhčit Guovdageainnus lohkaba ožžon goddináitagiid, dannego sunno bártnit sivahalloba veagalváldin-áššis. Sunno viesuin leat láset maid cuvkejuvvon.
 Sámi Radio: 15.06.2005 kl. 13:18
Dan sadjái go ollášuhttit iežas earána ja beassat sihkkut filmma, mas oidnogo son veagalváldo, lohká son ahte muhtun bážii sin guvlui.
Ikte muitaleimmet Sámi Radios sihke dien báhčima birra ja ahte nisu ja su olbmát ieža galget leat bálkestan geađggi priváhta-viesu láse čađa muhtun unna gilis Guovdageainnus. Nisu duođašta otne Sámi Radioi ahte diet lea duohta, muhto lohká ahte sii bálkestedje geađggi, dannego oidne muhtuma láses čuožžume bissuin.
Son biehttala ahte vulge gillái mávssahan dihte veagalváldima.
Nissona čilgehusa mielde galgá veagalváldin - mii galgá leat badjelaš mánu áigi dáhpáhuvvan - leat filbmejuvvon mobiltelefuvnnain. Filbma galgá das maŋŋel leat sáddejuvvon telefuvnnas telefuvdnii. Nisu - gii gárrenoaivves čuoččuha iežas veagalváldon - dadjá ahte fuopmái ahte dáhpáhus lei filbmejuvvon, go luoibmi, amas ádját riŋgegohte sunnje.
Sámiradio lea maid hupman viessoeaiggádiin otne. Son ii loga alddis mihkkege dahkamušaid áššiin, muhto ahte su ja su vielja bárdni sivahalloba leat leamaš báikkis, gos politiiját navdet veagalváldima dáhpáhuvvan. Son šiitá ahte livččii ovttage guvlui báhčán, muhto ii dieđe máid earát ležžet dahkan.
Sullii diibmu beal-guovttis 27. beaivve mannan mánus son lohká dien nissona boahtán iežas vieso lusa biillain ja ovttas olbmáiguin cuvken sus viessoláse.
Nisu galgá vuos leat riŋgen ovdalgo bohte. Maŋŋel dan galgá nisu ja su olbmát vuodján eará gillái ja cuvken doppe maid muhtun viesus láse. Olmmái - gii doppe orru - ii deaivan justte dalle leat ruovttus, muhto lohká Sámi Radioi ahte ii susge leat eará dahkamuš áššiin, go ahte su bárdni maid sivahallo finadan báikkis, gos veagalváldin galgá dáhpáhuvvan.
Sihke dát olmmái ja su viellja lohkaba iežasga ožžon goddináitagiid maid mobiltelefuvnna bokte nieiddas ja su olbmáin, ja ahte ášši lea váidojuvvon ja ahte politiiját leat oaidnán daid áitagiid. Dan eai duođaš vuos politiiját. Ovtta áitagis galgá - dán olbmá čilgehusa mielde - daddjot ahte nisu ja su olbmát áigot gáldet buot sámiid.
Guovdageainnu leansmánni, Nils Henriksen, ii loga vuos politiijáid hálddus filmma, mii čájeha veagalváldima. Filbma galgá leat mobiltelefuvnnain filbmejuvvon ja das maŋŋel sáddejuvvon olbmos olbmui.
Henriksen, duođawta ahte navdojuvvon báhčaleamis biilla guvlui ja geđgemis viessoláse čađa muhtun gilis Guovdageainnus galgá dahkamuš navdojuvvon veagalváldimii seamma guovllus.
Guovdageainnu leansmánni ii duođaš ahte guokte áhčeguovttos livččiiga váidán áitagiid maid lohkaba ožžon, dannego sunno bártnit sivahalloba veagalváldináššis.
Nieida ieš lohká Sámi Radioi ahte lea son lea sádden mobiltelefon-dieđu nubbái dán áhčeguoktái, maŋŋelgo su irgi ja diet áhčči leigga diggon. Son biehttala mangeládje áitán, muhto lohká baicca áittahallan.
|
