Beardu buoremus Davvi-Norgga suohkan nuoraide
Beardu suohkan lea njunnožis Davvi-Norgga suohkaniin nuoraid fálaldagaid, bargosájiid ja skuvlabohtosiid ektui. Suohkanstivra lea guhkkit áiggi vuoruhan nuoraidfálaldagaid, lohká sátnejođiheaddji.
 20.12.2004 kl. 10:57
Beardu lea okta viđa suohkaniin Norggas gosa nuoraide leat láhčojuvvon buoremus ássanvejolašvuođat. Dan čájeha iskan man NRK P-golmmeš lea čađahan. Beardu lea njunnožis Davvi-Norggas ja sátnejođiheaddji, Oddvar Björnsen lohká iežaset guhkit áiggi bargan buoridit buot fáladagaid nuoraide ja earáide. Ja su mielas lea somá go gullát ahte ná guhkás leat joavdan. Björnsen lohká ahte suohkana bealis oidnet ahte go bidjet ruđaid ovddidit nuoraidáššiid, de dát lea investeren iige gollu.
Nuorat servet ieža
Christoffer Eggen lea áŋgiris nuorra olmmái gii lea ovddidan nuoraidfálaldagaid, ja son lohká ahte lea dehálaš nuoraide searvat iešguđet nuoraidovddidan bargguide. Eggen lei mielde lágideami nuoraid juovlafeastta ovddit vahkoloahpa, ja dohko bohte 300 nuora iešguđet guovllus. Son ávžžuha eará guovllu nuoraid searvat iešguđet bargguide, main besset mearridit ja hábmet fálaldagaid.
Unnán bargguhisvuohta
Suohkanis lea unnán bargguhisvuohta, sullii 2 %, lohká sátnejođiheaddji. Dát dagaha ahte eanet nuorat bisánit suohkanii. Ja Bearddu sátnejođiheaddji Björnsen sávvá eará suohkaniid luohttigoahtit ja addit ovddasvástádusa nuoraide. Dáinna lágiin doaivu son maid eará suohkaniin buorránit nuoraide orrunvejolašvuođaid.
|
