Gáivuotna hálbuda mánáidgárde-mávssu beallái
Mannan bearjadaga mearridii Gáivuona suohkanstivra hálbudit mánáidgárdemávssu bealle haddái. Maŋŋel rievdama máksá ollesáigge sadji 1.200 ruvnno mánnui guovvamánu 1. beaivvi rájes boahtte jagi.
 20.12.2004 kl. 10:41
Gáivuona suohkanstivra doalahii ovdagotti mearrádusa vuolidit mánáidgárdemávssu bealle haddái. Dat mearkkaša ahte bearaš mas leat guokte máná mánáidgárddis, seastá badjel 20.000 ruvnno jahkkái.
Ilus sátnejođiheaddji
Sátnejođiheaddji Bjørn Inge Mo lea ilus, ja doaivu dáinna lágiin geasuhit smávvamánná bearrašiid suohkanii ja hehttet eretfárrema. Sátnejođiheaddji muitala suohkanstivrra ovttajienalaččat mearridan dán áššis ja dát lea maid hehtten dihte eretfárrema ja geasuhit smávvamánná bearrašiid suohkanii.
Hálbbimus Norggas
Dát hálbbes mánáidgárdesajit leat dasto hálbbimusat olles Norggas, ja sátnejođheaddji lohká boahtte hástalussan ásahit eanet bargosajiid Gáivutnii.
|
