Eai oastte guoira bohccuid
Finnmárkku njuovahagat vuoruhit oastit bohccuid orohagain gos dihtet leat buorit bohccot, illá osttet bohccuid orohagain gos lea beare olu boazu mearriduvvon boazologu ektui, go doppe leat sin mielas menddo heajos bohccot. Dat dieđusge goahcá boazologu unnideami mieđiha boazodoalloagronoma Mikke Ailo Gaup.
 Sámi Radio: 10.12.2004 kl. 10:49
Njuovahagat maiguin Sámi Radio lea hupman lohket, ahte sii eai balljo oastaše bohccuid daid orohagain gos lea olu boazu mearriduvvon boazologu ektui go dihtet, ahte doppe leat guoira ja heajos bohccot. Sii baicca vuoruhit oastit doppe gos dihtet, ahte leat buorit bohccot.
Heajos njuovvandeattut
Jus buohtastahttá gaskamearalaš deattu Oarje-Finnmárkkus njuvvon bohccuin mannan čavčča, de oaidná ahte leat stuora erohusat deattuin orohagaid gaskas. Muhtin orohagain lea gaskamearalaš deaddu varihin badjelaš 30 kilo ja eará orohagain gis ii leat go birrasii 22 kilo. Orohagat gos leat geahppaseamos bohccot, leat maiddái dat orohagat gos lea eanemus boazu mearriduvvon boazologu ektui ja gos galggaše eanemus njuovvat dál joksan dihte eiseváldiid gáibadusaid.
Njuovahagain leat vuohttan, ahte muhtin orohagain leat bohccot beare geahppasat. Ja dat muitala čielgasit, ahte doppe leat beare olu bohccot, lohket sii. Muhto dat seamma njuovahagat lohket maid ahte sii eai balljo oastaše bohccuid dáin orohagain, go dat leat beare heittogat. Sii baicca vuoruhit njuovvat bohccuid dain orohagain gos dihtet ahte leat buorit bohccot.
Vuohttán váttisvuođa
Dán leat maiddái boazodoalloeiseváldit vuohttán, muitala Oarje-Finnmárkku boazodoalloagronoma Mikkel Ailu Gaup.
-Dieđusge dahká dát boazologu unnideami váddáseabbun, muhto njuovahagat ožžot lassedaorjaga go njuvvet bohccuid orohagain mat leat šiehttadan boazodoalloeiseváldiiguin mot vuolidit boazologu. Dáid orohagaid gal vuoruhit njuovahagat, lohká Gaup.
Muhto dássážii eai leat go golbma orohaga ožžon dákkár njuovvanplána dohkehuvvot.
- , dádjá Gaup.
|
