Dutkit duođaštit ahte gávdnoje sámi njuorjjobivdit
Sámi njuorjjobivdit gávdnoje dološáiggis Ruoŧabealde. Bassiealli bierdna buktá vástadusaid dutkiide ođđa dutkanprošeavttas.
 Sámi Radio, Ruoŧa Sápmi: 03.12.2004 kl. 13:08
Dal boahtet ođđa duođaštusat mat nannejit sámi historjjá davvi Ruotas. Ođđa duktanprošeavttas čájehit arkeologat ahte leat gávdnon sápmelaččat geat bivde njuorjjuid olles riddoguovlluin davvi Ruotas. Lea sámi bassiealli bierdna, dahje guovža, mii lea čoavddus dutkiide.
Jagi 500 rájes
Mearrasápmelaččat leat áiggi čađa álot orrun Norgga vuotnaguovlluin, gos muhtumat otne nai ellet njuorjjobivddus ja guolastusas.
Dal sáhtet dutkit čájehit ahte davvi Ruotas maiddái lea leamaš mearrasámi guovlu, gos sápmelaččat leat bivdan njuorjjuid ja guolastan.
Olles riddoguovllus leat gávdnon čuohtenear dološ orrunsájit ja oaffarbáikkit mat geavahuvvoje jagi 500-logus gitta jagi 1300-lohkui.
Bierdnahávdi
Muhto lea dutkojuvvon bierdnahávdi Västerbottenis mii lea leamaš loahpalaš duođaštussan dutkiide, nu muitala dutki Britta Wennstedt Edvinger.
- Dát lea čielga bierdnahávdi ja go lea bierdnahávddis sáhkan lea dieđusge nu ahte lea sámi bázahus, lohká Britta Wennstedt Edvinger.
- Dat ledje juste dakkár duođaštusaid maid mii dárbbašeimmet, dutkiide ii leat ávki jáhkkit, fertejit gávdnot čielga duođaštusat, lohká Wennstedt Edvinger.
100 jagi áigge
Dutki Britta Wennstedt Edvinger lohká ahte lea erenoamaš dovdu ja hui gelddolaš dakkár bázahusaid gávdnat. Su mielas lea dát dutkansuorgi buot eanemus miellagiddevaš olles Skandinavas.
- Dat mii dahká dan dutkama nu miellegiddevaččan lea dat ahte mearrasámi kultuvra ii jávkan ovdalgo 100 jagi áiggi, dadjá Britta Wennstedt Edvinger.
 Bearjadaga dii 15.00
|
