Evttohit vel nuppi 10 jagi
ON:a eamiálbmogiid logijagis eai lihkostuvvan oažžut čoahkkái sierra eamiálbmot-julggaštusa. Dál evttohuvvojit lassin 10 eamiálbmot-jagi vai dát ollašuvašii.
 Sámi Radio: 04.08.2004 kl. 14:05
Ovttastuvvan nášuvnnaid eamiálbmot-logijahki loahpahuvvo dán jagi. Ulbmil dáinna logijagiin lei buoridit máilmmi eamiálbmogiid dili ja ásahit sierra foruma, mii bargá eamiálbmogiid áššiiguin. Eamiálbmotforum lea ásahuvvon, muhto nubbi dehálaš ulbmil, ráhkadit sierra eamiálbmot-julggaštusa, ii leat lihkostuvvan.
-Dát livččii deháleamos bargu jus fal ON miehtá almmuhit lassi 10 jagi eamiálbmogiid nammii, lohká Mattias Åhrén Sámeráđis.
Sihkarastašii olmmošvuoigatvuođaid
Sámeráđi olmmošvuoigatvuođa-ossodaga jođiheaddji Mattias Åhrén mielde livččii sierra eamiálbmot-julggaštus buorebut gáhtten eamiálbmogiid vuoigatvuođaid go dan maid omd. ILO konvenšuvdna 169 dahká.
-Dákkár julggaštus livččii buorebut sihkkarastán eamiálbmogiid olmmošvuoigatvuođaid, nu go mánáid skuvlafálaldagaid, dearvvašvuođabálvalusaid ja maiddái attašii eamiálbmogiidda eanet iešmearrideami. Muhto váttis áššit nu go vuoigatvuođat eatnamiidda ja ressursaide leat maŋidan ja dahkan váttisin dán julggaštusbarggu mainna leat bargan juo 3 jagi Genevas, čilge Åhrén.
Forum buorre boađus
Jagis 1995 dat álggahuvvui ON logijahki mii galggai oažžut máilmmi eamiálbmogiid vártnuhis dilli buorebut oidnosii, ja nu maiddái váikkuhit, ahte bargagoađaše čoavdin dihte dáid váttisvuođaid.
-Dán eamiálbmot logijagis lea ON:a siskobeallái ásahuvvon sierra bistevaš forum eamiálbmogiid várás, ja dat iešalddis lei okta dán logijagi deháleamos ulbmiliin, dadjá Åhrén.
Dehálaš joatkit
Muhto Åhrén lohká ain dehálažžan joatkit bargguin oažžut sierra eamiálbmotjulggaštusa. Dán jáhkká sáhttit gárvvistuvvot moatti jagi geahčen jus fal ON lasiha logi lassejagi eamiálbmogiid nammii.
-Dat, mii maiddái lea dehálaš sierra eamiálbmot-julggaštusain, lea ahte dat livččii čájehan ON riikkaide ja ON vuogádahkii mat leat vuolimus gáibádusat leat eamiálbmogiid olmmošvuoigatvuođaid dáfus. Julggáštus sáhtašii maid geahpidit eamiálbmotforuma viidáset barggu, lohká Mattias Åhrén.
|
