 |
čálit 
|
|
|
|
|
|
|
|
|
|
- Inuihtat dárbbašit sámiin veahki
|
|
|
|
|
|
|
-Dego skealbma galggaši iežas láhkarihkkuma dutkat
Canada politiijat áigot ieža dutkat mii dáhpáhuvai go politiijat godde inuihtaid beatnagiid Davvi-Canadas moaddelogi jagi áigi. Inuihtaid mielas lea die dego skealbma galggaši iežas láhkarihkkuma dutkat.
 Sámi Radio: 03.05.2005 kl. 14:15
Inuihtat leat gáibidan ahte eiseválddit guorahallet manne inuihtaid beatnagat báhččojedje gaskkal 1950 ja 1970.
Canada politiijat lohket áigut geiget iežaset guorahallama eiseválddiide, muhto inuihtaid mielas lea áibbas boastut go politiijat ieža áigot guorahallat ášši.
Logis ain eallime
Unnimusat logi ovddeš politiija leat ain eallimin geat moeddelogi jagi dás ovdal ledje mielde politiijaveagas mii eiseválddiid ovddas jođii Canada arctalaš guovllus ja báhče inuihtaid beatnagiid.
Inuihtaid organisašuvnnat Davvi-Canadas leat gáibidan Canada njunuš eiseválddiid guorahallat ášši ja sii gáibidit ahte dál almmuhuvvo mii lei sivva beanagoddiimii .
Inuihtat cuiggodit
Inuihtaid ovddasteaddjit cuiggodit garrasit dan go Canada politiijat seaguhit iežaset daid guorahallamiidda.
- Livčče dego muhtin skealbma biddjošii ieš dutkat iežas vearredagu, dovddahit sii.
Dál lohká Canda politiijaid njunuš Nunavut`as Davvi canadas, Paul Uong, Nunatsiak News aviisii ahte politiijat áigot ieža dutkat daid vuoras politiijain mii duođaid dáhpáhuvai.
- Rapporttaid áigot addit eiseválddiide , lohka Oung. Son ii miedit muitalit geat dat ovddeš politiijat leat. Oung maid vuordnu ahte sii áigot dáinna guorahalllamiin dušše duohtavuođa čilget, eai ge áiggo geahččalit čiegadit mii duođaid dáhpáhuvai.
Máŋga teoriija
Inuihtat eai ožžon dalle makkárge čilgehusaid politiijad, eai ge dieđe vel dál ge manne sin beatnagat báhččojedje.
Beatnagat ledje dalle dehálaš fievrrut inuihtaide maiguin johte bivdobáikkiide ja inuihtaid ássanguovlluid gaskka. Ollugiidda lei stuorra roassu go sii fáhkka ledje fievrruid haga ja lei maiddái lossat sidjiide oaidnit mo politiijat báhče beatnagiid.
Muhtumat navdet ahte eiseválddit godde beatngaiid danne go hálidedje ahte inuihtat eai šat galgan johtit viidát Canada arktalaš guovllus, muhto ásaiduvvat čoahkkebáikkiide. Earát ges navdet ahte okta sivva beanagoddimiidda sáhttá leat dat ahte eiseválddit hálidedje ahte inuihtat oastigohte boicca skohteriid dan sadjái go beatnagiid geavahit fievrun.
|
