Tromsa buorida mánáidgárdefálaldaga
Davvi-Norgga stuorimus gávpot buorida dál mánáidgárdefálaldaga sámi mánáide.
 Sámi Radio: Kent Valio Heivehan: Ánne Biret Anti: 12.04.2005 kl. 09:00
Jagi geahčen galget Romssas leat 20 ođđa sámimánáidgárdesaji. Romssa suohkan hukse čieža ođđa mánáidgárddi ja okta dain lea stuora sámi mánáidgárdi. Dan muitala Romssa suohkana prošeaktajođiheaddji, Solfrid Rognmo.
Dárbu eambbo mánáidgárdesajiide
Datgo Romssa suohkan dál hukse nie ollu ođđa mánáidgárdesajiid lea oassin ráđđehusa mánáidgárdereforpmas, man mielde galggaše fállot mánáidgárdesajit buohkaide, geat dan háliidit. Romssa suohkan lea gávnnahan ahte livččii dárbu eanet sámi mánáidgárdesajiide maid.
40 saji
Dan ođđa sámi mánáidgárddis, máid Romssa suohkan dál áigu hukset, galget leat 40 saji sámi mánáide. Dat mearkkaša ahte suohkan fállagoahtá 20 eanet mánáidgárdesaji sámi mánáide, go dássážii lea dahkan. Ođđa ja stuora sámi mánáidgárdi galgá gárvvis jo jagi geahčen.
Romssa studeantamánáidgárddi sámi ossodat áigu ain dálludit sierra sajis.
|
