Deanu gielddas áigot geahččalit gárrenmirkkogeavaheami eastadit buoret diehtojuohkimin.
Boahtte mánus galgá Deanu gielddastivra gieđahallat gieldda gárrenmirkkoplána, mii dál leamaš gulaskuddamis. Danne áigu Deanu gielda boahtte vahkkus lágidit seminára, mas gieldda politihkkárat ja ássit, erenomážit vánhemat galget oahppat, mo olmmoš lea oaidnit, go lea narkotihkáin dahje alkoholan gárehuhttán iežas, nu muitala Deanu gieldda bajásšaddan- ja fuolahuslávdegottejođiheaddji Kristin Rajala
 Sámi Radio: Anne Olli, heivehan: Ásllat Niittyvuopio: 10.03.2005 kl. 09:01
Rajala ii loga Deanu gielddas leat jugešvuođa ja eará gárihuhttinmirkkuid geavaheami stuorábun go earáge gielddain Finnmárkkus, Son lohká Klinikk Nord galgat muitalit semináras mo livččii vejolaš divššodit sin geat leat sorron gárehuhttin ávdnasiidda, dego alkoholii ja narkotihkká mirkkuide.
Deanu leansmánni dat galgá čilget mo sáhttá oaidnit makkár gárihuhttin ávdnasiin olbmot leat gárihuhttán iežaset. Dát lea erenoamaš dehálaš vánhemiidda muitalit, go ollugat sis eai dieđe mo sáhttet vuohttit maiguin nuorat gárihuhttet iežaset.
Buohkat sáhttet boahtit dán seminárii dán mánu 16. beaivvi gielddaviessui. Kristin Rajala lohká seminára lágidit maid dannego hálidit oaččut ollislaš oainnu áššái, ovdalgo mearridit makkár gárrenmirkkoplána galgá leat.
|
