 |
čálit 
|
|
|
|
|
|
|
 |
|
|
Sámi Joatkaskuvlla stivra, Mats Steinfjell gurotrávddas |
|
|
Riddu ja Sis-finnmárkku barget ovttas
Guovdageainnu Sámi Joatkaskuvla heađástuvai go ii lean oahpaheaddji duiska gielas. Heađis ohcalii veahkki Honesvági Joatkaskuvllas. Dát buvttii buori ovttasbarggu Sis Finnmárkku ja Riddo Finnmárkku gaskii, nu muitala Guovdageainnu Sámi Joatkaskuvlla rektor Mats Steinfjell
 Sámi Radio: 18.02.2005 kl. 14:52
Mats Steinfjell ii loga dušše duiskagielas leat ovttasbarggu, ainnat sii Guovdageainnus fállet fas Honesváge ohppiide oahpahusa sámi kultuvrras
Steinfjell lohká ovttasbarggu vuolgán das go sis váilui duiskagiel oahpaheaddji. Danne sii válde oktavuođa Honesvági joatkaskuvllain go dihte ahte doppe sáhttet oahpahit neahta badjel.
Steinfjell lea ilus go fitnejedje ovttasbarggu Honesvági joatkaskuvllain. Honesvágis dat ohcaledje ges oahpahusa sámi kultuvrras, ja dan sáhttet sii Guovdageainnus fállat daidda.
Sámi-oahppu buohkaide
Finnmárkku fylkkagielda dat lea mearridan ahte buot joatkaskuvllaoahppit Finnmárkkus galget fitnet oahppu sámi kultuvrras. Ná fitnejit maid buoret oktavuođa riddo- ja sis Finnmarkku gaskii. Son illuda dainna go ovdagáttut sámiide leat rievdan riddoguovlluin ja giitevaš lea maid dáinna go Finnmárkku fylkkagielddas leat rievdadan oainnuid sámiid ektui.
Marit Tjernstad lea son gii Honesvági joatkaskuvllas oahpaha Guovdageainnu nuoraid neahta badjel. Son lohká gáiddusoahpahusa leat stuorra hástalussan. Son muitala gáiddusoahpahussii fertet gávdnat eará oahpahanvugiid go muđui klássaoahpahussii.
Gierdevažžan maid lohká iežaset fertet leat, go das han lea oahpahus dušše fal šearpma badjel.
Somás deaivadeapmi
Guovdageainnu oahppit leat fitnan galledeamen Honesvági joatkaskuvlla ja dán lohká Honesvágioahppi Stien Dreyer lean hui somá. Iežaset lohká oahppan olu sis, ja sii maid áigot Guovdageainnus fitnat. Dasa ges illudit Guovdageainnus, lohká Sámi Joatkaskuvlla oahppi Elle Rávdna Sara.
Son lohká juo nu hárjánan gáiddusoahpahussii ahte sáhtašii vel eará fágainge ná oahpahuvvot.
|
