Moaitá Hollywood filbmadahkkiid
Sámi filbmabargi moaitá garrasit, ahte ođđa ameriikkalaš Ofelaš-filmmas galgá vilges olmmoš beastit indiánaid.
 Sámi Radio: 11.02.2005 kl. 10:35
– Hollywood joatká badjelgeahččama go ráhkada ođđa Ofelaš-filmma nu, ahte vilges olbmuid mánná gádju indiánaid, oaivvilda Sámi filbmabargiid searvvi ovdaolmmoš Bjarne Store-Jakobsen. Son oaivvilda, ahte filbmabuvttadeaddjit galggašedje váldit sápmelačča ráđđeaddin filbmabuvttadeapmai.
Dološ Ofelaš-filmmas goddaledje čuđit sápmelaččaid. Ameriikká filmmas Pathfinder galget vikingat rievidit ja goddit indiánaid. Ofelaš-filbma ráhkaduvvui 1987:s. Vuoigatvuođat filbmii leat máŋga jagi áigi vuvdon Hollywoodii. Ofelačča váldoneavttár, Mikkel Gaup, logai TV-ođđasiidda, ahte su mielas ii daga maidige, ahte Ofelaš-muitalus ráhkaduvvo ođđa hámis Hollywoodas.
Sámi filbmabargi, Bjarne Store Jakobsen, dadjá goitge, ahte Pathfinder sáhttá botnjat duohtavuođa nu, ahte historjá ipmirduvvo boastut.
|
