Engerdala suohkanstivra lea ikte mearredan doalahit fálaldaga Elgå bajásšaddanguovddážis ain juo jagi.
Sámi Radio: 28.01.2005 kl. 10:10
Elgå bajásšaddanguovddáš Engerdalas, Hedmárkkus ii heaittihuvvo dattetge. Bajásšaddan-guovddážis lea sierra giellamovttiidahttin fálaldat lullisámi mánáide. Engerdala suohkanstivra lea ikte ovttajienalaččat mearredan doalahit dán skuvlafálaldaga goitge jagi vel. Nu muitala sátnejođiheaddji Dag Rønning.
Elgå bajásšaddanguovddážis lea sihke mánáidgárdi ja skuvla. Bealli mánáin leat sámegielagat. Dan dihte leage skuvllas sierra giellamovttiidahttinprošeakta, mii lea leamaš mielde ealáskahttimen lullisámegiela guovllus.
Engerdala suohkana hálddahus lei evttohan heaittihit skuvlla ja mánáidgárddi, vai suohkan seasttašii ruđa. Ikte lea suohkanstivra gieđahallan dán ášši ja mearredan doalahit fálaldaga sihke dán skuvllas ja maiddái dan nuppi giliskuvllas suohkanis.
Sátnejođiheaddji Dag Rønning lohká, ahte dát skuvlafálaldat lea sihkkaraston goit jahkái vel. Dál áigot geahččalit bargat guovddáš eiseválddiid ektui, vai sáhtašedje sihkkarastit fálaldaga ain viidáseappot. - Lullisámegiela fálaldat lei okta ágga bisuhit Elgå bajásšaddanguovddáža, lohká Rønning.
Sámi Radio: 28.01.2005 kl. 10:10
