Árvvoštallet heaittihit doarjjaortnega
Eanandoallodepartementa árvvoštallá ođđasit doarjjaortnega man mielde boazosámi eatnit ožžot ruđa oahpahit mánáide boazodoalu. Dutki lea evttohan heaittihit dán ortnega váilevaš dárkkisteami dihte.
 Sámi Radio: 04.01.2005 kl. 10:17
1999 rájes leat boazosámi nissonat sáhttán oažžut ruhta doarjaga jus oahpahit mánáidasaset juoidá boazodoalu birra. 2002 radjái lea stuorimus doarjjasupmi 100.000 ruvnno ja maŋŋel dan unnui dát supmi 24.000 ruvdnui. Agderforskning lea dárkkistan ortega Norgga eanandoallodepartementta ovddas. Váldomoaitta ortnegii lea, ahte dasa ii leat leamaš makkárge almmolaš dárkkisteapmi ja ahte ii leat leamaš makkárge gáibadus dasa maid mánát galget oahppat. Dan dihte evttoha dutkanásahus, ahte ortnet loahpahuvvo, goit gaskaboddosaččat.
Eanandoallopolitihkkalaš ossodaga direktevra Marit Myklevold lohká, ahte dákkár doarjjaortnegiid lea dehálaš guorahallat, ja dan dihte dingojedje dán raportta Agderforskningas.
Bissehuvvo gaskaboddosaččat?
Departementa lea dál easka guorahallame maid galget dahkat dainna doarjjaortnegiin, ja Myklevold dadjá ahte sáhttá šaddat nu ahte dat gaskaboddosaččat bissehuvvo, goit dassažii go gávdnet buoret vuogi mot daid ruđaid geavahit.
-Go iešalddis lea dehálaš, ahte dat máhttu mii boazodoallonissoniin lea fievrriduvvo viidaseabbot. Muhto dat vuohki mot dát doarjjaortnet dássážii lea doaibmán, ii soaitte leat buoremus vuohki, ja dan fertet dán arvvoštallat, lohká Mylkevold.
|
