Ivgu suohkan áiggošii huksegoahtit njuovahaga
Ivgu suohkan lea váldán badjelasas suohkanii ásahit njuovahaga. Dán galggai muhtun priváhta olmmái hukset, muhto son ii ožžon doarjaga Innovasjon Norges. Danne heaittihii barggu.
 23.12.2004 kl. 10:25
Sátnejođheaddjis, Werner Kiilas lea buorre doaivva ollášuhttit prošeavtta. Boahtte jagi álggus áigu son gullat boanddain ja boazosápmelaččain maid sii oaivvildit dán njuovahaga ásaheami birra.
Heaittihii plánaid
Ivgulaš Håkon Karlsen dat plánegođii njuovahaga guokte jagi dás ovdal. Jurdda lei ásahit smávit njuovahaga Årnessii Ivgus. Doppe livččii sáhttán njuovvat sullii logi-duhát ealli, nugo sávzzaid, bohccuid ja gáiccaid, čállá áviisa Nordlys. Plánat ledje gárvásat, muhto váilevaš doarjja Innovasjon Norges bissehii viidáset barggu, muitala sátnejođiheaddji Werner Kiil.
Ii ábut heaittihit
Dál leat suohkana bealis soahpan Håkon Karlseniin ahte vejolaččat joatkit prošeaktabargguin. Sátnejođiheaddji lohká prošeavtta nu buorren, ahte dán ii sáhte heaittihit. Kiil lohká njuovahagas šaddat 7-8 ođđa bargosáji, ja boahtteáiggis ain eanet.
Atnit ávkki olles eallis
Sátnejođiheaddji lohká dán njuovahaga hui earenoamážin, dan dihte go plána lea geavahit buot osiid dain elliin maid njuvvet. Dábálaččat njuovahagat atnet ávkki dušše bierggus. Ođđajagimánus áigu sátnejođiheaddji ságastallat sihke boanddaiguin ja boazodolliiguin servet go prošektii. Plána lea maid ahte sii galget mielde bargojovkkus mii galgá bargat ásahemiin.
|
