Eanetlohkku stivre giellalága čađaheami
Eanetloguálbmoga ideologiijat stivrejit mo sámi giellaláhka čađahuvvo Ruoŧas, oaivvilda dutki
 Sámi Radio, Ruoŧabeal Sápmi: 22.12.2004 kl. 09:57
Juste dal leat golbma sierra guorahallama jođus mat gusket Ruota unnitlogupolitihkkii. Okta dain guorahallin lea professor Kenneth Hyltenstam gii leat geahčadeamen mo Eurohparáđi konvenšuvnnat leat váikkohan dili Ruotas.
Hyltenstam oaivvilda ahte eanetloguálbmoga ideologiijat leat mat stivrejit.
Čuvvot lágaid
Kenneth Hyltenstam lohká leat eanetloguálbmoga jurdagat mat stivrejit makkar návccat galget biddjot ja got giellalága galgá čađahit.
Son oaivvilda maiddái ahte muhtun dásin Ruota servvodagas leat hui vuollegis gáibadusat giellalága ektui, eiseváldit eai čuovu lágaid eanet go dárbbašlaš, ja ii baljo dan ge.
Váikkuhanvejolašvuođat
Lea Riikabeaivvi láhkalávdegoddi mii lea diŋgon daid guorahallamiid mat gusket unnitloguálbmogiidda ja unnitlogugielaide.
Guorahallamat galget váldit sealvái got unnitloguálbmogiid váikkuhanvejolašvuođat leat nannejuvvon ja jos stáhta lea gáhtten unnitlogugielaid doarvái bures.
Eanet dárkkisteapmi
Lars Elenius, Luvlaja universitehtas galgá iskkat man ládje olbmot leat geavahan suoma ja sámegiela eiseváldiid oktavuodain Norrbottenis.
Kenneth Hyltenstam bargu leat dutkat got Ruotta lea čuvvon Eurohparáđi konvenšuvnnaid.
Hyltenstam oaivvilda ahte Ráđđehus ja Riikabeaivi ferte váldit vuhtii ahte giellalágat duođalaččat čáđahuvvot ja čuvvojuvvot ja soaitá dasa fertet bidjat eanet návccaid dárkkistaneiseválddiide, lohka Kenneth Hyltenstam.
 Disdaga dii 08.00
|
