Kárášjohka juolluda unnimus ruđa searvegoddái
Kárášjoga gielda lea dat sámi suohkan, mii juolluda unnimus ruđalaš doarjaga searvegottiide. Kárášjoga searvegottis leage dál nu heajos ruhtadilli, ahte sii eai suitte šat rehkegiid máksit, lohká Kárášjoga girkoverdde Åsmund Samuelsen.
 21.12.2004 kl. 10:32
Dáhkádus ii leat máksojuvvon
Girkoverdde muitala ahte dáhkádus ii leat máksojuvvon, vaikko rehket lea boahtán juo geasset. Nu ahte jus girku buollá, de das ii oaččo buhtadusa, dadjá Samuelsen.
Unnimus gielda buoremus
Unjárga lea dat gielda Sis-Finnmárkkus, mii lea dán jagi juolludan eanemusat ruđa searvegoddái. Juohke searvegoddelahttu nammii lea Unjárgga searvegoddi ožžon 924 ruvnnu dán jagi.
Kárášjoga gielda ges lea juolludan unnimus ruđa, dušše 642 ruvnnu juohke searvegoddelahttu nammii. Kárášjoga gielda ii maid fála nuvttá bálvalusaid searvagoddái, nu go eará gielddat dahket.
Eará gielddain Sis-Finnmárkkus eai dárbbaš searvegottit máksit viessoláiggu, eaige gieldda divadiid, nu go ovdamearkan čáhcedivadiid. Maiddái dihtorbálvalusat, rehketdoallu ja bálkádoaimmat leat eará guovlluin nuvttá searvegottiide. Nu ii leat goitge Kárášjogas, gos searvegoddi gártá ieš máksit visot.
Leat ožžon ruđa
Sátnejođiheaddji Kjell Sæther, dadjá gieldda dál juolludan birrasit 100.000 ruvnno, vai besset máksit dáhkádusaid. Sæther maid dadjá ahte gieldda bealis leat gáibidan duođaštusa makkár golut girkus leat, muhto dat bohte gildii beare maŋŋit, lohká Sæther.
|
