Boraspire lea goddán bohccuid Sis-Finnmárkkus
Meahccebálvusa bargi, Henrik Eira lohká ahte boraspire dat lea goddán 7 bohcco mat gávdnoje Sis-Finnmárkkus. Eira lea dál sihkkár ahte lea gumpe dahje albbas mii lea goddán dáid.
 21.12.2004 kl. 10:08
Dál leaba meahccebálvalusa bargiguovttos Henrik Eira ja Erlend Søgård gávnnahan ahte boraspire dat lea goddán dan 7 bohcco maid leat gávdnan Bávttajoga ja Gošjoga guovllus, Guovdageainnu ja Kárášjoga gaska. Henrik Eira lohká ahte leaba iskkan ráppiid, muhto eaba duostta duođaštit sihkkarit leago gumpe vuoi albbas goddán dáid.
Fylkamánni birasgáhttenhoavda doaivu addot báhčinlobi jus gumpe lea goddán bohccuid. Henrik Eira lohká ahte fertejit vuordit dassái gávdnet boraspire luottaid. De easka sáhttet duođaštit goappá eallis lea sáhka.
Ožžot buhtadusa
Henrik Eira lohká ahte boazoeaiggádat ožžot buhtádusa dáin goddon bohccuin. Eira muitala ahte leat soahpan boazoeaiggádiiguin ahte galget dieđihit sidjiide jus gávdnet boraspireluottaid guovllus. Dalle vulget iskat luottaid, ja doaivumis sáhttet dasto duođaštit goabba ealli lea goddán bohccuid.
Lohpi báhčit gumppe
Finnmárkku fylkamánni birasgáhttenhoavda, Bente Cristiansen, lohká ahte boazoeaiggát gii vaháduvvo gumppe geažil, sáhttá ohcat báhčinlobi fylkamánnis.
Cristiansen deattuha maid Stuoradikki mearrádussii ahte gumpe ii galgga leat guovlluin gos leat bohccot, ja dán vuođul sáhttá ge oažžut báhčinlobi. Muhto dalle ferte duođaštuvvon Meahccebálvalusa dahje Stáhta luonddubearráigeahču bealis ahte duoai lea gumppes sáhka. Ja Cristiansen doaivu maid álkit oažžut lobi báhčit gumppe Finnmárkkus go Lulli-Norggas.
|
