Suoma Sámediggi ii dohkkehan ruhtaplána
Suoma Sámedikki dievasčoahkkin máhcahii boahttejagi ruhtageavahanplána stivrrii. Plánas ii boahtán ovdan doarvái bures, masa Sámedikki ruđat mannet.
 21.12.2004 kl. 09:48
Suoma Sámedikki dievasčoahkkin máhcahii boahttejagi ruhtageavahanplána stivrii. Ruhtageavahanplánas ii boahtán ovdan, masa ruđat galget mannat.
- Sámedikki bušeahta oktavuođas lea dárbu namuhit dárkilit, man ollu miige doalvu ruđa, lohká sámediggeáirras Irja Seurujärvi-Kari.
Eanaš ruhta bálkái
Suoma Sámedikki boahtte jagi ruhtageavahanplána mielde badjelaš 2 miljon euro bušeahtas (váile 60 proseantta) lei jurddašuvvon Sámedikki joraheapmái. Eanaš ruhta galggai mannat bargiid bálkkáide.
Ruhtageavahanplánas ii goitge namuhuvvon, man ollu iešguđetlágan politihkálaš doaimmaide várrejuvvo ruhta.
Sámedikki iešguđetge lávdegottit, dego ovdamearkan ealáhus- ja vuoigatvuohtalávdegoddi, mii galggašii geahččalit ovddidit sámiid ealáhusaid ja vuoigatvuođaid, eai namuhuvvon oppanassiige. Dasa ii lean várrejuvvon mangelágan doaibmaruhta.
|
