- Ii váldde badjelasas sámi kultuvrra
Norgga kulturdepartemeanta ii áiggo váldit Beaivváš Sámi Teahtera iige earáge sámi kulturásahusaid ruhtajuolludemiid ruovttoluotta stáhtabušehttii.
 Sámi Radio: 16.12.2004 kl. 11:05
Norgga kulturdepartemeantta mielas leat Sámedikkis buorit evttohusat sámi kultuvrra ovdáneamis. - Departemeanta áigu maid vuđolaččat árvvoštallat sámi servodaga ruhtadárbbu, deattuha stáhtačálli Yngve Slettholm.
Sámedikki ráđđelahttu, Randi Skum, evttohii, ahte Kulturdepartemeanta válddašii badjelasas juolludemiid Beaivváš Sámi Teahterii, go Sámediggi ii oro nákcemin vuoruhit teahtera váilevaš ruhtajuolludemiid geažil. - Dat lea sakka šallošahtti, ahte sámi kulturbargit ellet gearjideaddjin Norgga servodagas, lohká Skum.
Sámediggi juolluda dál 33 miljon ruvnnu kultuvrii. Eanaš ruhta manná kultur- ja giellaguovddážiidda. Sámedikkis ohcet jagis jahkái eanet kulturruđa. Ovdamearkan girjjálášvuohta vuordá ruhtadeami Sámedikkis váile 9 miljon ruvnnu ovddas. - Kulturdepartemeanta ii goitge mieđit Sámediggái evrrege eanet kulturruđaid, váidala Randi Skum.
Beaivváš Sámi Teahter oažžu jagis 2005 váile 12 miljon ruvnnu stáhtadoarjaga. Dat ii goitge leat doarvái ealihit Beaivváža áidna sámegielat našunála teahterin, šálloša teahterhoavda Harriet Nordlund. - Beaivváš Sámi teahter dárbbašivčče seamma ollu ruđa go guovlluteahterat, dego Nordlándda teahter, jos Sámis galggaš leat ealli teahterbiras, lohká Randi Skum.
Kulturdepartemeantta stáhtačálli, Yngve Slettholm, čoahkkimastii gieskat sámediggeráđiin sámi kultuvrra dárbbuid birra. Stáhtačálli bivdá goitge Sámedikki heaitit eret duššiid cuvcamis. Beaivváš Sámi Teahtera doaibma lea ja bissu Sámedikki ovddasvástádussan, ja nu dat lea leamaš jagi 2002 rájes.
|
