75 miljon ruvnnu Finnmárkui
Stuorradiggi lea ikte juolludan 75 miljon ruvnnu Finnmárkui. Dát ruhta galgá geavahuvvot háhkat ođđa bargosajiid. Dáid ruđaid galget jo dán jagi geavahišgoahtit, muhto dat eai leat jurddašuvvon dušše Várggáide dahje riddoguovlluide, lohká Kristalaš Álbmotbellodaga stuorradiggeáirras Einar Steensnæs.
Sámi Radio: 15.12.2004 kl. 10:55
Stuorradikki eanetlohku oaidná heahtedili Finnmárkkus, ja nu juollodit ruđa, mii galggašii buktit ođđa bargosajiid. Dien 75 miljon ruvnnu galggašii geavahit daid báikkiin Finnmárkus, gos orru dárbu. Kristalaš Álbmotbellodaga stuorradiggeáirras sávvá gielddaid ja Finnmárkku filkkagieldda nákcet árvvoštallat prošeavttaid maidda ruhta berre bidjot.
- Dát ruđat eai galgga leat veahkkin dušše Várggáide, gos lea stuorra heahtedilli dál, muhto eará guovlluide maid galget ávkašuvvat ruđain, čilge Einar Steensnæs. Ruđat galget 2005 rájes geavahuvvot.
Ovdamearkan Guovdageainnus lea juo guhká leamaš 10% bargguhisvuohta. - Danne livččii lunddolaš, ahte maiddái Guovdageaidnu ávkašuvašii dien ruđain, ja orru buorre maid Einar Steensnæs lohká, rámida sátnejođiheaddji Klemet Erland Hætta.
Finnmárkku filkkasátnejođiheaddji, Helga Pedersen, oaivvilda goitge Stuorradikki lasseruđaid berret juolluduvvot riddoguovlluide. Son ii dieđe, mo ruđaid galget juohkkit, muhto dihto doaimmaid berrešii vuoruhit, lohká Pedersen. - Ovdamearkan guolástusindustriijai berre sihkaraststit doarvái barggu, nu go Innovasjon Norge berre oažžut doarvái ruhtadeami, ja maiddái earát, geat oččodit ođđa doaimmaid Finnmárkui, lohká Pedersen.
|