- Álki suoládit Sámi divraseamos govvadáiddačoakkáldaga
Girkonjárggas, Davvi-Norggas, leat 350 John Savio gova. Savio adno Sámi buot stuorámus govvadáiddárin ja danne árvvoštallo dán čoakkáldaga árvun máŋga miljon ruvnnu. Savio-musea konservahtor, Sigrun Rasmussen, mielde maiddái dáid govaid livčče álki suoládit.
 Sámi Radio: 24.08.2004 kl. 11:49
Sotnabeaivve dolvo suollagat Munch-museas, Oslos, guokte gova, mat adnojit Norgga stuorámus dáiddadávvirin. Edvard Munch-govaid "Skrik" ja "Madonna" árvu lea 5.000.000-
700. 000.000 ruvnnu. Dán geažil lágidii Savio-musea, Girkonjárggas, ikte čoahkkima, mas hupme dan birra, leago sin govaid menddo álki suoládit.
Savio-museas Girkonjárggas lea Sámi nubbin divraseamos ja nubbin stuorámus Savio-čoakkáldat. Stuorámus almmolaš čoakkáldat lea Tromssa museas. Savio-museas Girkonjárggas leat 350 gova, maid John Savio-rohki lea ráhkadan. Savio adno olles Sámi historjjá stuorámus dáiddárin ja su govaid árvvu ii báljo sáhte ruđain mihtidit.
Olbmot leat máksán Savio-govain bidjegiin 10.000-65.000 ruvnno. Dán mielde livčče Savio-musea čoakkáldaga árvu 3.000.000-20.000.000 ruvnnu.
|
