-Olgoriikadepartementa ii diehtán riikačiekčamiin
Norga gal ii dohkket Davvi-Kyprosa sierra riikan ja olgoriikadepartemeanta ii diehtán Sámi riikkačiekčamiin maidege ovddalgihtii. Dan čilgii Norgga ambassadevra Ruotas ikte kyproslaš diplomáhtaide.
 Sámi Radio: 04.08.2004 kl. 08:53
Norgga olgoriikadepartemeanttas eai diehtán maidege ovddalgihtii Sámi ja Davvi-Kyprosa gaskasaš riikačiekčamiin. Dan čilgii Norgga Ruota ambassadevra go ikte deaivvadii Stockholmmas Kyprosa ambassáda ovddasteaddjiiguin. Kyprosa Charge d`affaires lea cuiggodan dáid čiekčamiid.
- Olgoriikadepartemeanttas ii lean mihkkege dahkamušaid dáiguin čiekčamiiguin, čilge Norgga olgoriikadepartemeantta diehtojuohkkinráđđeaddi Eirik Bergesen.
Kypros šalloša čiekčamiid
Sámi spábbačiekčanriikajoavku ja Davvi-Kypros deaivvadeigga Alfheim čiekčanšilljus Romssas mannan gaskavahku. Kyprosa ambassáda lea maŋŋel dán čiekčama reageren garrasit go Norgga gielda- ja guovludepartementa lei juolludan 30 000 ruvnno Sámi spábbačiekčanriikajovkku čiekčamii Davvi-Kyprosa vuostá. Norgga ambassadeavra šattai ikte čilget ášši Kyprosa Charge d'Affaires:ii.
- Son maid čilgii, ahte dát ii mearkkaš ahte Norga dovddasta Davvi-Kyprosa sierra stáhtan, lohká olgoriikadepartementta diehtojuohkinráđđeaddi Eirik Bergesen.
Ii sierra stáhta
Bergesen lohká dábálaččan, ahte olgoriikkaid ambassádat sáhttet gáibidit dákkár čoahkkimiid jus sin mielas leat áššit nággenveara. Bergesena mielas lei maid dát buorre vejolašvuohta sis duođaštit, ahte Norga ii dohkket Davvi-Kyprosa iešráđálaš stáhtan.
- Kyprosa ambassáda maid šállošii go riikačiekčamat lágiduvvojit, muitala Erik Bergesen loahpas.
|
