 |
čálit 
|
|
|
|
|
 |
|
|
STUORRA LÁVKI: Álgoálbmotguovddáža jođiheaddji Magne Ove Varsi mielas livččii ándagassii átnumis stuorra ruđalaš mearkkašupmi USA indiánaide. |
|
|
Vedjet átnut ándagassii indiánain
USA veadjá átnut iežaset álgoálbmogiin, indiánain ándagassii fasttes vearredaguid ovddas maid leat dahkan máŋga čuođi jagis.
 Sámi Radio: 22.07.2004 kl. 11:03
Dássážii lea USA biehttalan mieđiheames makkárge ovdalaš áiggi vearredaguid indiánaid vuostá . Danne leage hui erenoamáš go dál lea ovddiduvvon árvalus átnut indiánain ándagassii.
-Dan sii gal duodai ánssášivčče, lohká Álgoálbmotvuoigatvuođaid gelbbolašvuođaguovddáža jođiheaddji Magne Ove Varsi, gean mielas livččii ándagassii átnon okta stuorámus lávkkiin ovddosguvlui indiánaid dili buorideamis dálá Amerihka servodagas.
Gillán čuđiid jagiid
Amerihkka indiánain lea surgadis historjá maŋemuš 200 jagis. Sii leat gevrehallan ruovttuineaset ja gottahallan čáhkken dihte saji vilges olbmuide. Oktiibuot gottahalle máŋga čuođi duháha indiána sođiin 200 jagis, álbmotgoddiimiin, sođiin dahje dávddain. USA eiseválddit eai atnan sin olmmožin ja easkka 80 jagi áigi ožžo sii jienastanvuoigatvuođa.
Senator Sam Brown dat lea ovddidan dán resolušuvdna mas čilge movt USA lea rihkkon šiehtadusaid, rivven eatnamiid ja maid goddalan indiánaálbmogiid, muhto dieđusge čállojuvvon olu fiidnábuš sániiguin. Resolušuvnnain ávžžuha USA átnut ándagassii indiánain.
Stuorra lávki
Ii leat čielggas dohkkeha go USA kongressa ja presideanta George W Bush dán, vai hilgot go sii oalát ávžžuhusa, muhto liikka lea dát historjjálaš dáhpáhus. Ii goassege ovdal leat almmolaš eiseválddit jienádan maidege vearrivuođaid birra indánaid vuosta, čállá VG. Vaikko movt manaš ávžžuhusain, de lea dát vuosttaš lávki
Ruđalaš mearkkašupmi
Vaikko resolušuvdna ii namut sátnegežiin ge buhtadusaid birra nu movt muhtin militanta indianajoavkkut leat gáibidan, jáhkká Magne Ove Varsi ahte dat šaddá stuora váikkuhus dás.
-Davviriikkain leat sihke Norgga stáhta ja Ruota stáhta átnon sápelaččain ándagassii, muhto das ii dáidde leat nu stuorra mearkkašupmi, ii aŋkke erenoamážit ekonomalaččat, go jos USA ánošii ándagassii indiánain, čilge Varsi.
-Jos kongreassa dohkkeha dán resolušuvnna de jáhkan, ahte ášševuoddjit gáibidišgohtet ruđalaš buhtadusaid ja mávssuid dáid gillámušaid ovddas maid áiggiid čađa ja maiddái odná dán beaivve šaddet gillát, oaivvilda Varsi.
|
