Ballet skuvlla heaittiheames
Skániid joatkkaskuvllas áigot boahtte čavčča heaittihit goalmmátoasi skuvllas, nu lea Romssa fylkkagielda mearridan.
 Sámi Radio: 24.05.2004 kl. 09:55
Boahtte čavčča áigu Romssa fylkagielda heittihit goalmmátoasi Skániid joatkkaskuvllas. Sihke oahppit, váhnemat ja oahpaheaddjit, ballet dán fylkkagieldda taktihkkan heaittihit olles skuvlla ja sirdit oahppiid Harstad joatkkaskuvlii.
-Dáid plánaid áigot hehttet, dasgo skuvla lea áidna skuvla mii addá Durdnossámegiel oahpahusa Norgga bealde, čilge oahppi Runar Myrnes Balto.
Skániid joatkkaskuvllas leat oahppit Skánit, Evenášši ja Tjeldsund suohkaniin. Oahppit leat maid guovtti fylkkas, Nordlánddas ja Romssas. Dál leat oktiibuot 120 oahppi skuvllas, ja 11-12 dáin leat sámegiel oahppit.
Skuvlla eaiggáduššá Romssa fylkkagielda mii lea mearridan heaittihit ovtta álgoluohká ja ovtta joatkkaluohká. Sivvan dasa lea go oahppiid lohku lea nu unni, de ii leat ruhta doalahit skuvlla dán dásis, čilge skuvlla rektor Karl Erik Holm.
Maiddái son atná unohassan go goalmmátoassi skuvllas galgá heaittihuvvot.
|
