Olu filbmageahččit Skábmagovat-festiválas Ánaris.
Ánáris, Suomas lágiduvvui guđát geardde Skábmagovat álgoálbmot-festivála mannán vahkkoloahpa ja eai goassige ovdal lean čoagganan ná olu geahččit go dán jagi. Ánárlaš, Pirita Näkkälajärvi lei boahtán Helssegis geahččat filmmaid ja su mielas lei erenoamaš buorre dássi sámi filmmáiguin.
 Sámi Radio: 31.01.2005 kl. 10:47
Skábmagovat-Álgoálbmot filbmafestivála alggahuvvui 1999:s ja dalle ledje sullii duhát geahčči. Festivála lea sturron dađistaga ja dán jagi ledjege juo 2.500 geahčči, muitala okta lágideaddjiin, Liisa Holmberg. Ánárlaš, Pirita Näkkälajärvi gii lei boahtán Helssegis, logai erenoamaš buorre dási sámi filmmain ja su mielas lei "Liikon ruoná ivdnái" buoremus filbma, man Eilif Aslaksen ja Nils John Porsanger leaba ráhkadan.
Dáppe čájehuvvo muđui eará sámi dokumentárafilmmat ja álgoálbmotfilmmát. Skábmagovat festivála lea sturron jagis jahkkái ja maid gehččiid lohku lea lassanan, lohká Pirita Näkkälajärvi ja doaivu maid boahtte aiggis beassat boahtit dán festiválii.
|
