Boaozodoallohálddahus doalaha evttohusas
Boazodoallostivra galgá ođđasit mearredit guovvamánu 7. beaivve, goabbá Inkeri Eira Fallås guoktás Ole Henrik Kappefjellain galgá oažžut vuoigatvuođa boazodollui Jillen-Njaarke orohagas, Nordlánddas. Boazodoallohálddahus doalaha iežas evttohusa addit doalu Inkeri Eira Fallåsii, lohká boazodoallohálddahusa senior ráđđeaddi Christian Lindmann.
 Sámi Radio: 27.01.2005 kl. 10:49
Inkeri Eira Fallås váiddii boazodaollostivrra mearrádusa diggái, go oaivvildii, ahte son dat livččče galgan oažžut doalu, iige Ole Henrik Kappfjellii. Oslo diggegoddi celkii skábmamánus diibmá, ahte boazodoallostivrra mearrádus ii leat lobálaš, go stivra ii lean doarvái bures vuođuštan iežas mearrádusa.
Boazodoallostivra galgá dál ođđasit gieđahallat dán ášši. Boazodoallostivra sáhttá doalahit ovddit mearrádusas, ja addit doalu Ole Henrik Kappfjelii, dahje dat sáhttá dahkat nu go boazodoallohálddahus lea evttohan ja addit doalu Inkeri Eira Fallåsai. Boazodoallostivra sáhttá maid doalahit Nordlándda guovllustivrra mearrádusa, mii lei addit doalu Raymond Kvitfjellii. Dán mearrádusa váiddiigage earret eará Eira Fallås ja Kappfjell boazodoallostivrii. Dán váidaga boazodoallostivra fertege dál gieđahallat ođđasit, lohká Lindmann.
Ole Henrik Kappfjell oaččui doalu boazodoallostivrras ovddit čavčča. Son lea bargan bohccuiguin badjel jagi dainna ipmárdusain, ahte sus lea doallu. Kappfjell vuordáge, ahte boazodoallostivra ii válddašii sus eret dan doalu maid ovdal lea addán. Jus nu fal dáhpáhuvaš, de lea son gearggus diggái mannat, go oaivvilda alddes leat árbevirolaš vuoigatvuođaid dán guovlui. Boazodoallohálddahusa senior ráđđeaddi, Christian Lindmann, lohká ahte boazodoallostivra ii sáhte váldit vuhtii vejolaš dikkáskemiid go meannudit dán ášši.
|
