Hálida ruoktot
Guovdageainnu-nieida, gii dál lea Puhket-sullos, hálida ruoktot. Son muitala ahte oaidná bures ahte Thailanddas lea stuora roassu.
 Sámi Radio: 27.12.2004 kl. 12:11
Badjel 15.000 olbmo leat dássážii dieđihuvvon jápmán maŋŋelgo eanandoarggádus dagahii logi mettara alu báru, mii bođii earret eará Thailandda gáddái, gos ollu norgalaččat leat luomus dál. Guovdageaidnulaš, Ellen Oline Sara, lea justte dál luomus bearrašiinis Phuketas Thailanddas. Son muitala ahte buot lea billašuvvan dán suolos.
– Buot lea billašuvvan. Buot stránda lea billašuvvan. Stránddas lea stuora fatnasat mannan njuolga gaskkat. Nu leat maiddái pálmat. Stuora biilat leat hoteallaid ja báŋkkuid siste. Buot lea billášuvvan dáppe, muitala Ellen Oline Sara.
Movt don vásihit go diet stuora bárru bođii gáddái?
– Mun ledjen juste de jođus stránddái ja de logai dat olmmoš gii bargá dien hoteallas gos mun orrun ahte, mun in álggus ipmirdan maid dat meinii, áidna maid mun ipmirdin lei ahte son humái juoga čáži birra – ja de jurddašin ahte mun aŋkke manan dohko. Muhto gal mun fuopmájin ahte gal dál goit lea juoida oalle boasttut. Go gáhta mielde bohte stuora mohtorfievrrut ja olbmot huike ja olbmot vihke juohke guvllui. Mun dieđusge suorgániin ja mannen ruovttoluotta iežan hotellii, dadjá son.
Maid lehpet hommen mannan ijá?
– Mii letnot dušše čoahkkan ja vuordán goas bat dal nuppe bárru boahtá. Ii dat boahtán, ja olbmot lohke ahte dat galggai leahkit vel stuorát. Nu ahte oađđan gal in leat dan ijá. Ja ihkku lei hui unná eanandoarggástus. Dovddui veháš. Ja dat gal lei oalle issoras. Nu ahte dál lean girdišilljus, vuolgimen eret dán Puhket-sullos.
Maid dus lea dál eanemus miella bargat?
– Ná, Guovdageainnus ruovttus leat. Dáppe lea áibbas kaos. Dáppe lea nohkan čáhči ja biepmo, ii mihkkege lea šat rábas.
|
