- Badjelgeahččá Statskoga bargiid
Sihke Statskoga direktevra, Asbjørn Mathisen, ja Statskoga stivrrajođdiheaddji, Kirsti Kolle Grøndahl, atniba unohassan dan go ovddeš sámediggepresideanta, Ole Henrik Magga, gohčoda Statskoga Sámi eatnama rievideaddjin.
 Sámi Radio: 05.10.2004 kl. 10:56
Statskoga njunnožat ballet iežaset bargiid massit bargosajis. Muhto luhttet dasa, ahte Stuoradiggi doarju ráđđehusa Finnmárkoláhkaevttohusa, man mielde Statskoga bargit ožžot barggu dan ođđa Finnmárkku opmodagas, mii boahtte áiggis šaddá hálddašit stáhta eatnamiid.
Stuorradikki ovddeš presideanta ja dálá Statskoga stivrrajođiheaddji, Kirsti Kolle Grøndahl, lohká dálá ON:a álgoálbmot foruma jođiheaddji, Ole Henrik Magga, fallehan boasttu olbmuid go gohčoda Statskoga Sámi eatnama rievideaddjin. - Magga badjelgeahččá Statskoga bargiid, lohká Kirsti Kolle Grøndahl.
Ovddeš Sámediggepresideanta, Ole Henrik Magga, lohká, ahte sus eai leat ođđa oainnut Statskoga birra. Son imaštalla dan go son ii sáhte buktit oainnuid Statskoga birra, nu guhká go ii leat rihkkon makkárge lágaid. Magga imaštalla maiddái dan go nu ollugat dál cuiggodit su oainnuid ásahusa birra. - Son ii leat eisige fallehan Statskog Finnmárkku bargiid dáinna, čilge Magga.
Statskoga stivrrajođiheaddji, Kirsti Kolle Grøndahl, bivdá Magga váldit oktavuođa ráđđehussii ja Stuoradiggái jos ležžet moaitámušat Statskoga ektui. Kolle Grøndahl duođašta dan, ahte Statskoga bargit dál ballet iežaset boahtteáiggis.
Maiddái Finnmárkku Stuorradiggeáirasat oaivvildit, ahte Magga ii lean berret jienádit ja moaitit Statskoga, lohká Olgešbellodaga Stuorradiggeáirras, Raymond Robertsen.
|
